జమ్మికుంట, (తేదీ 11-10-2025):
జమ్మికుంట పట్టణంలోని ప్రకాష్ కృషి విజ్ఞాన కేంద్రం (KVK) లో ఈరోజు “ప్రధానమంత్రి ధన-ధాన్య కృషి యోజన మరియు పప్పుధాన్యాల స్వావలంబన మిషన్ ప్రారంభం” కార్యక్రమాన్ని ప్రత్యక్ష ప్రసారం ద్వారా వీక్షించేందుకు ప్రత్యేక ఏర్పాట్లు చేశారు. కేంద్ర ప్రభుత్వం యొక్క ఈ కీలక కార్యక్రమాన్ని స్థానిక శాస్త్రవేత్తలు, బీజేపీ నాయకులు, రైతులు మరియు యువ శాస్త్రజ్ఞులు వీక్షించారు.
ఈ సందర్బంగా, ప్రధానమంత్రి నరేంద్ర మోదీ దేశవ్యాప్తంగా వ్యవసాయ మౌలిక సదుపాయాల నిధి, పశుసంవర్ధకం, మత్స్య సంపద మరియు ఆహార ప్రాసెసింగ్ రంగాలలో మొత్తం 1,100 కి పైగా ప్రాజెక్టుల ప్రారంభోత్సవం మరియు శంకుస్థాపన కార్యక్రమాన్ని నిర్వహించారు. జమ్మికుంట KVKలో ఏర్పాటు చేసిన ఈ ప్రత్యక్ష ప్రసారాన్ని స్థానిక రైతులు ఆసక్తిగా గమనించారు.
ఈ కార్యక్రమంలో కృషి విజ్ఞాన కేంద్రం (KVK) శాస్త్రవేత్త వెంకటేశ్వరరావు మరియు బీజేపీ నాయకులు ఆకుల రాజేందర్, కొలకాని రాజు పాల్గొన్నారు. నూతన పథకాలు, వ్యవసాయ అభివృద్ధికి సంబంధించిన ప్రసంగాలను రైతులు మరియు యువ శాస్త్రజ్ఞులు శ్రద్ధగా ఆలకించారు.
వ్యవసాయ రంగంలో స్వావలంబన సాధించడానికి మరియు రైతుల ఆదాయాన్ని పెంచడానికి ఉద్దేశించిన ఈ పథకం గురించి మరియు దాని ప్రయోజనాల గురించి కార్యక్రమంలో పాల్గొన్న రైతులు చర్చించుకున్నారు.
